Arsenali bind Viniciusin dhe nis negociatat me Realin
Klubi anglez po përgatit një mega-ofertë për lojtarin që refuzoi pagën prej 20 milionë eurosh në vit të ofruar nga Real Madridi.
LONDËR — Klubi i Arsenalit ka arritur marrëveshje në parim për kushtet personale me yllin e Real Madridit, Vinicius Junior, duke hapur rrugën për një nga transferimet më të bujshme të kësaj vere. Klubi anglez raportohet se është gati të fillojë negociatat zyrtare me klubin spanjoll, duke prezantuar një mega-ofertë financiare për sulmuesin brazilian.
Ky zhvillim vjen pas dështimit të bisedimeve për rinovimin e kontratës së Viniciusit me Real Madridin, e cila skadon në qershor të vitit 2027. Madrilenët i ofruan brazilianit një pagë të re prej 20 milionë eurosh në vit, por lojtari kërkoi 30 milionë euro, duke refuzuar ultimatumet e drejtuesve spanjollë.
Real Madridi nuk dëshiron të prishë strukturën e pagave për asnjë futbollist dhe synon shitjen e tij të shpejtë për të shmangur largimin me parametra zero. Vinicius Junior iu bashkua spanjollëve në vitin 2018 nga Flamengo për 45 milionë euro, duke shënuar 128 gola dhe fituar dy trofe të Champions League.
Në vitin 2024, sulmuesi doli i dyti për Topin e Artë, pas spanjollit Rodri, duke konfirmuar statusin e tij si një ndër më të mirët në botë. Ndërkohë, agjencia e tij përfaqësuese Roc Nation pritet të udhëheqë bisedimet e vështira që mund ta dërgojnë atë drejt Premier Ligës angleze.
Burim: Gazeta Express
— Redaksia ZHURMA