Arrestohet në Greqi Odhise Dhima për furnizim të sportistëve me doping

Policia greke vuri në pranga mëngjesin e së enjtes, 12 nëntor, në rajonin e Atikës, trajnerin e peshëngritjes Odhise Dhima, 58 vjeç, i cili është vëllai i kampionit olimpik Pirro Dhima. Ai u ndalua nën dyshimin se u jepte sportistëve substanca të ndaluara për ngritjen artificiale të rezultateve sportive, ndërsa gjatë aksionit u sekuestruan 15 mijë euro.

Aksioni i autoriteteve pasoi një hetim që kishte nisur prej disa muajsh. Policia e kreu këtë procedurë në bashkëpunim me dy institucione zyrtare: Organizatën Greke Antidoping (EOKAN) dhe Organizatën Kombëtare të Barnave (EOF). Hetuesit zbuluan se 58-vjeçari dyshohet se e ushtronte këtë veprimtari ilegale që nga prilli i vitit 2024, duke shfrytëzuar pozicionin e tij si trajner për shpërndarjen e preparateve të ndaluara.

Gjatë kontrolleve në shtëpinë e tij dhe në disa ambiente sportive në Atikë, policia sekuestroi 871 ampula e tableta që dyshohen si doping, 17 kartela ose dokumente sportistësh, shënime me dorë dhe një telefon celular. Organizata Kombëtare e Barnave njoftoi se këto produkte farmaceutike nuk kishin leje tregtimi në Greqi dhe përbëjnë rrezik shëndetësor. Një prej rasteve të evidentuara përfshinte djalin e tij të mitur, në urinën e të cilit u gjet oksandrolon, substancë e ndaluar nga WADA. Për këtë ngjarje, trajneri ishte ndëshkuar më parë me 12 vite pezullim, kurse i mituri me 10 muaj përjashtim nga sporti.

Pas prangosjes, Odhise Dhima u dërgua në prokurori ku do të përballet me procedurat gjyqësore, teksa hetimet vazhdojnë për dokumentimin e plotë të rastit. Ndaj tij është ngritur dosje penale për shkelje të ligjit mbi sportin dhe përhapje të barnave të dëmshme.