Arrestohet 18-vjeçari në Korçë, zbardhen dy vjedhje të ndodhura në qytet

KORÇË — Strukturat e rendit në këtë qytet kanë finalizuar një operacion hetimor për dokumentimin e krimeve kundër pronës, duke vënë në pranga një shtetas dhe duke shpallur në kërkim personin e dyshuar si bashkëpunëtor. Nga verifikimet e kryera, uniformat blu kanë identifikuar dhe kapur 18-vjeçarin me iniciale A.H., ndërkohë që është shpallur në kërkim bashkëmoshatari i tij me iniciale E.Ll.

Sipas autoriteteve, dyshohet se të rinjtë kanë kryer bashkërisht vjedhjen e një marketi në lagjen numër 16, ngjarje e regjistruar afro një muaj më parë. Gjithashtu, gjatë hetimeve të mëtejshme, blutë kanë dokumentuar një tjetër ngjarje të ngjashme të ndodhur disa javë më parë në një bar-kafe të lagjes numër 9, ku dy të dyshuarit kanë vepruar në bashkëpunim me njëri-tjetrin.

Për zbardhjen e këtyre krimeve, shërbimet policore kanë analizuar pamjet e kamerave të sigurisë dhe kanë kryer veprime të tjera hetimore. Nga këto biznese, autorët dyshohet se kanë marrë mallra dhe sasi parash. Dokumentacioni i plotë i çështjes i ka kaluar Prokurorisë për ndjekje të mëtejshme ligjore.