Pse kundërshton shqiptari dënimin për drogë në Belgjikë?

ANTVERP — Gjykata e Antverpit rihapi këtë muaj çështjen e Arlind K., 21-vjeçari shqiptar që u dënua në mungesë me 15 muaj burg për drogë. I kapur në gusht të vitit 2024 me mbi 140 gramë kanabis dhe hashash në makinën që drejtonte, ai kundërshtoi vendimin dhe kërkoi rigjykim, duke mohuar akuzat për trafikim droge.

K. i tha gjykatës se punon si berber dhe se nuk kishte dijeni për drogën, ndërsa mohoi çdo lidhje me krimin. Avokatja e tij argumentoi se nuk ka prova të mjaftueshme që ai të konsiderohet korrier droge — sipas saj, ishte thjesht në vendin e gabuar, në kohën e gabuar.

Kontrolli i telefonit të K. zbuloi mesazhe me adresa për dorëzimin e drogës, si dhe foto e video me sasi kanabisi dhe parash në dorë; në njërën prej tyre ai shihej qartë. Sipas prokurorisë, telefoni tregoi se prej disa javësh K. vepronte si korrier (runner) për një organizatë të trafikut të drogës.

Në seancë, prokurori u shpreh se provat ishin të mjaftueshme dhe se K. kishte pak lidhje me Belgjikën, duke kërkuar konfirmimin e dënimit të dhënë në mungesë. Kryetari i trupit gjykues ironizoi mbrojtjen e të riut: Nuk kam dëgjuar ndonjëherë që dikush të porosisë 140 gramë kanabis te berberi, tha ai.

K. mohoi akuzat përmes përkthyesit në gjuhën shqipe: Unë punoj si berber, tha ai, madje kam krijuar edhe klientelën time në Antverp. Ai shtoi se zotëron edhe pajisjet e nevojshme që vërtetojnë profesionin e tij. Telefonin me mesazhet e dorëzimeve, ai e atribuoi pasagjerit, duke thënë se nuk ishte i tij.

K. ishte dënuar më 13 shkurt me 15 muaj burg dhe një gjobë, pasi nuk u paraqit në gjyq. Prokurori kërkoi konfirmimin e dënimit të dhënë në mungesë, ndërsa vendimi për rigjykimin pritet të shpallet më 14 korrik.

Burim: Shqiptarja
— Redaksia ZHURMA