Çfarë libri shqiptar përzgjedh Dua Lipa për klubin e saj të leximit?

DIASPORA — Dua Lipa, një nga këngëtaret shqiptare më të suksesshme në botë, përzgjodhi librin "Free" të shkrimtares Lea Ypi për platformën e saj Service95 Book Club. Kjo zgjedhje sjell në qendër të vëmendjes ndërkombëtare një histori të fuqishme mbi Shqipërinë dhe rrugëtimin e saj drejt lirisë.

Lea Ypi ishte vetëm 11 vjeçe kur u rrëzua socializmi në Shqipëri, pasi kishte besuar me përkushtimin e pafajshëm të një fëmije te Stalini dhe "Xhaxhi Enver" Hoxha, i cili udhëhoqi Shqipërinë me regjim të ashpër për më shumë se katër dekada. Libri rrëfen këtë periudhë përmes syve të një fëmije, duke bërë që edhe realiteti më i pazakontë të duket normal.

Dua Lipa veçon episodin kur një kanaçe bosh e Coca-Cola-s bëhet simbol statusi në Shqipërinë e izoluar të asaj kohe. Përmes historive të tilla, Lea Ypi tregon absurditetin e jetës nën diktaturë, por edhe ndryshimet e mëdha që solli rënia e komunizmit.

Sipas Dua Lipës, "Free" nuk është vetëm një libër për fundin e komunizmit, por edhe për sfidat që solli liria — mbyllja e fabrikave, humbja e vendeve të punës, ndarja e familjeve. Ky vlerësim përbën një moment krenarie për shqiptarët, pasi dy figura me origjinë shqiptare bashkojnë emrat e tyre për t'ia sjellë botës historinë dhe kulturën shqiptare.

Lexo edhe: Lea Ypi: filozofe politike — nga Tirana te katedra e LSE-së — eksponati i plotë.

Burim: KultPlus
— Redaksia ZHURMA