Ardian Gjini: S’kemi obligim ndaj marrëveshjes për presidentin

Kryetari i Aleancës, Ardian Gjini, ka reaguar ndaj marrëveshjes së arritur mes Lëvizjes Vetëvendosje dhe Lidhjes Demokratike të Kosovës për propozimin e Bekim Sejdiut për president të vendit. Ai bëri të ditur se subjekti që drejton nuk e konsideron veten të lidhur me këtë marrëveshje, duke rikujtuar se Aleanca e ka qëndrimin e saj të përcaktuar prej 7 qershorit.

Gjini u shpreh se nuk kanë kurrfarë obligimi ndaj çfarëdo marrëveshjeje që bëjnë dy partitë e tjera politike dhe se nuk shohin vullnet nga kjo qeveri për t'u marrë me temat që u përkasin qytetarëve dhe të ardhmes së vendit. Lidhur me mundësinë e përgjigjes ndaj një ftese nga kryeministri në detyrë Albin Kurti dhe kreu i LDK-së, Lumir Abdixhiku, ai nuk dha sinjale për pjesëmarrje.

Duke e cilësuar situatën si një përpjekje që nuk i shërben zgjidhjes së problemeve, Gjini shtoi se nuk ka kohë për lojëra fëmijësh që sipas tij bëhen me qëllim të mashtrimit të opinionit publik dhe dërgimit të Kosovës në zgjedhje për t'ia lënë fajin partive të tjera.