Apeli lë në fuqi aktakuzën ndaj Rozeta Hajdarit dhe të tjerëve për rezervat

Gjykata e Apelit e ka lënë në fuqi aktakuzën ndaj ish-ministres Rozeta Hajdari, zyrtarëve të MINT-it, Hafiz Garës dhe Irfan Lipovicës, si dhe biznesmenit Ridvan Muharremit lidhur me aferën e rezervave shtetërore, pasi ka refuzuar ankesat e mbrojtësve të tyre. Sipas vendimit të Apelit, aktvendimi i Gjykatës Themelore në Prishtinë i datës 13 mars 2026 është nxjerrë në përputhje me dispozitat e procedurës penale dhe mbështetet në provat e dëshmitë e lëndës, duke i hapur rrugë kalimit të çështjes në shqyrtim gjyqësor.

Ish-ministrja Hajdari, Lipovica dhe Gara akuzohen për keqpërdorim të pozitës apo autoritetit zyrtar në bashkëkryerje, si dhe për zbulim të fshehtësisë zyrtare, ndërsa biznesmeni Muharremi akuzohet për ndihmë në kryerjen e kësaj vepre penale. Çështja penale përfshin dyshimet për mosardhjen e produkteve të blera, anashkalim të procedurave ligjore dhe zbulim të fshehtësisë zyrtare, me një dëm të llogaritur prej rreth 3 milionë eurosh, ndërsa të pandehurit prezumohen të pafajshëm deri në një vendim përfundimtar të gjykatës.