Apeli francez rrëzon Ermal Beqirin, biznesmeni thotë se çështja është politike

Gjykata në Amiens të Francës ka marrë vendim për të rrëzuar kërkesën e biznesmenit Ermal Beqiri për t'u liruar nga qelia, ndërsa ky i fundit ndodhet i ndaluar në paraburgimin e Beauvais. Gjatë seancës ku u shqyrtua kërkesa e tij, e cila pasoi paraqitjen e tij para trupit gjykues, u shqyrtua në themel edhe çështja e ekstradimit të kërkuar nga autoritetet në Tiranë.

Prokuroria e Posaçme Kundër Korrupsionit në Shqipëri e dyshon biznesmenin për përfshirje në skandalin e AKSHI-t dhe ka ngritur ndaj tij akuza për disa vepra penale, përfshirë pastrimin e produkteve të veprës penale, korrupsionin aktiv dhe shkeljen e barazisë në tendera si pjesë e një grupi të strukturuar kriminal. Për të mbështetur kërkesën e ekstradimit, autoritetet shqiptare dërguan dokumentacion shtesë që përfshinte shkresa nga Drejtoria e Përgjithshme e Burgjeve, ministri i Drejtësisë dhe drejtuesi i Prokurorisë së Posaçme.

Këto dokumente shtesë u kontestuan nga avokati mbrojtës Nicolas Paganelli, i cili i quajti ato drafte dhe vuri në dyshim besueshmërinë e tyre institucionale. Nga ana e tij, biznesmeni Ermal Beqiri deklaroi para autoriteteve franceze se procesi ndaj tij është i motivuar politikisht dhe se nuk ka besim te drejtësisë shqiptare. «Nëse kam korruptuar dikë, ai është shteti. Por nga kjo anë, askush nuk është në burg. Gjithsesi, këtu ka një problem. Kjo çështje është thjesht politike», u shpreh ai.

Prokurorja e përgjithshme në Amiens kërkoi ekstradimin e tij, duke argumentuar se vlerësimi i sistemit gjyqësor të Shqipërisë nuk përbën kompetencë për dhomën e hetimeve dhe shtoi se në Shqipëri po ndodh një spastrim i madh i organizuar. Më herët, Beqiri ishte ndaluar pas një fluturimi me avionin e tij privat mbi centralin bërthamor Penly, ku u dënua me gjobë prej 7 mijë eurosh për shkelje të lartësisë së lejuar, ndërkohë që autoritetet franceze i kanë sekuestruar gjithashtu një kështjellë të shekullit të 16-të në Berneuil-en-Bray, llogari bankare me mbi 2.1 milion euro, apartamente, automjete, një jaht dhe një avion të lehtë.