Mostrat e para të shkumës në Vardar dalin brenda normave
Ministria e Mjedisit njoftoi se uji është brenda normave të lejuara, ndërsa raporti përfundimtar i laboratorit pritet të dorëzohet më 4 gusht.
Redaksia ZHURMA · · Përditësuar · 1 min lexim
SHKUP — Rezultatet e para të analizave për shkumën e bardhë të vërejtur në lumin Vardar, afër derdhjes së lumit Lepenc, tregojnë se parametrat e ujit janë brenda kufijve të lejuar. Ministria e Mjedisit Jetësor njoftoi se analizat fiziko-kimike fillestare nuk kanë treguar tejkalim të normave të shkarkimit në ujërat sipërfaqësore.
Inspektorati Shtetëror për Mjedisin kreu kontrolle në subjektet industriale përreth zonës, por nuk konstatoi asnjë shkelje të kushteve ekologjike. Raporti paraprak i ndërmarrjes 'Ujësjellësi dhe Kanalizimi' në Shkup ka konfirmuar po ashtu se analizat e mostrave nuk kanë treguar tejkalime të vlerave kufitare të lejuara.
Megjithatë, këto rezultate mbeten paraprake dhe për të pasur një pasqyrë të saktë pritet raporti nga laboratori i akredituar. Ky raport duhet të dorëzohet më 4 gusht, pas së cilës institucionet do ta informojnë publikun për gjendjen e plotë në lumin Vardar.
Burim: TV21
— Redaksia ZHURMA
