Pse arrestoi AMP katër funksionarë policie në Sarandë?
Agjencia e Mbikëqyrjes Policore ndaloi shefin e komisariatit dhe tre specialistë, të dyshuar për shpërdorim detyre dhe favorizim të subjekteve kriminale.
Redaksia ZHURMA · · Përditësuar · 1 min lexim
SARANDË — Agjencia e Mbikëqyrjes Policore (AMP) ka ndaluar katër funksionarë të Policisë së Shtetit në Sarandë, të dyshuar për lejimin dhe favorizimin e ndërtimeve pa leje.
Të ndaluarit janë Komisar Gëzim Bashllari, Shef i Komisariatit; Nënkomisar Andi Duro, specialist për hetimin e krimeve; Nënkomisar Ajdin Ismailaj, specialist për rendin; dhe Inspektor Robert Çullaj, specialist zone. Kundër tyre rëndojnë dyshime për shpërdorim detyre (neni 248 i Kodit Penal), veprime arbitrare (neni 250) dhe mosmarrjen e masave për ndërprerjen e gjendjes së paligjshme (neni 251), të kryera në bashkëpunim.
Sipas AMP-së, hetimet tregojnë se funksionarët kanë krijuar skema për përfitim të paligjshëm dhe kanë favorizuar subjekte të lidhura me struktura kriminale, duke mos ndërmarrë masa ligjore ndaj ndërtimeve pa leje. Hetimet vazhdojnë për identifikimin e personave të tjerë të implikuar.
Burim: Gazeta Express
— Redaksia ZHURMA
