Aleanca refuzon takimin me Kurtin pa gjashtë kërkesat e saj
Deputeti Besnik Tahiri thotë partia nuk kërkon poste qeveritare, por një letër zyrtare të Prishtinës drejt Uashingtonit për gazin amerikan.
PRISHTINË — Kryeministri në detyrë, Albin Kurti, e ka ftuar Aleancën në një takim për të diskutuar formimin e institucioneve të reja, por partia refuzon të ulet në tavolinë pa u adresuar gjashtë kërkesat e saj programore. Deputeti i zgjedhur Besnik Tahiri e bëri të qartë këtë qëndrim për Ekonomia Online.
Tahiri e cilësoi mospajtimin çështje politikash publike, jo ndarje pushteti. “Pikat tona programore, që janë rrjedhimisht kërkesa të politikave publike, janë publike”, deklaroi ai, duke shtuar se përgjegjësia për të vepruar bie mbi Qeverinë e Kosovës, jo mbi Aleancën.
Për projektin e gazit amerikan, Tahiri kërkoi një hap konkret: Qeveria e Kosovës t'i dërgojë Departamentit të Shtetit amerikan një letër me të cilën zotohet si shtet për infrastrukturën e gazit. “Kjo s'ka të bëjë me ne, ne s'e dojmë me na e çu neve atë letër”, tha ai, duke sqaruar se vendimet e tjera mbeten të Qeverisë.
Tahiri hodhi poshtë akuzat se Aleanca po bllokon procesin për interes partiak. “Ne nuk po kërkojmë hise në qeveri. Ne nuk po bllokojmë për shkak se po lypim ministri, as ambasadorë, as kryetar Kuvendi”, deklaroi ai, duke shtuar se Aleanca ka qenë gjithmonë “parti shtetformuese”.
Ai kritikoi qeverisjen e dy viteve të fundit, duke thënë se Kosova “kurrë në historinë e vet politike nuk ka qenë në një situatë më të rëndë” për shkak se po udhëhiqet me ushtrues detyre. Sipas Tahirit, kjo është “vetë synimi strategjik” i Kurtit, që synon të kontrollojë rregullatorët dhe paranë publike pa mbikëqyrje nga Kuvendi.
Gjashtë kërkesat e bëra publike nga Aleanca përfshijnë: pranimin e projektit të gazit amerikan si projekt strategjik; nisjen e procedurave për një termocentral me thëngjill; rritjen e pragut të TVSH-së nga 30 mijë në 100 mijë euro për bizneset e vogla; lirimin e tokës së punuar nga tatimi në pronë; financimin e plotë të projekteve infrastrukturore; dhe një fond prej 800 milionë deri në 1 miliard euro për investime në Prishtinë.
Sipas Tahirit, Aleanca ka hequr dorë nga çdo kërkesë për poste në qeveri “vetëm për një arsye — për ta shpëtuar këtë vend, Kosovën”, duke garantuar në këmbim vetëm pozicionet e veta në Kuvend.
Burim: Epoka e Re
— Redaksia ZHURMA