Albian Hajdari mungon disa muaj pas operimit, konfirmon menaxheri Fischer

Qendërmbrojtësi i Hoffenheimit dhe i Përfaqësueses së Kosovës, Albian Hajdari, do të mungojë për disa muaj dhe pritet të rikthehet në fusha në fundin e muajit janar, siç ka konfirmuar menaxheri i tij, Sascha Fischer.

Siç raportoi Zhurma më 14 tetor 2026, mbrojtësi i Kosovës dëmtoi fascien plantare gjatë stërvitjes dhe u njoftua se do t'i mungojë Përfaqësueses në ndeshjet e ardhshme.

Futbollisti ishte dëmtuar fillimisht gjatë grumbullimit me Përfaqësuesen e Kosovës në muajin shtator, gjë që e kishte detyruar të kthehej te klubi gjerman i Hoffenheimit për të vijuar procesin e rehabilitimit. Megjithatë, pikërisht kur po afrohej momenti për t'u kthyer në fusha dhe stërvitje, ai pësoi një tjetër lëndim gjatë një seance stërvitore me skuadrën gjermane. Sipas njoftimit të dhënë nga menaxheri Sascha Fischer, lojtari pësoi një çarje të pjesshme në shputën e këmbës dhe iu nënshtrua një ndërhyrjeje kirurgjikale për shkak të dëmtimit të rëndë. Një çarje e pjesshme e fascies plantare zakonisht shkakton dhimbje të forta në shputën e këmbës, veçanërisht në zonën e thembrës ose në pjesën e mesme të saj, duke i shkaktuar vështirësi lojtarit gjatë vrapimit, kërcimit dhe ndryshimit të drejtimit në fushë. Kohëzgjatja e rikuperimit varet nga përmasat dhe vendndodhja e çarjes, duke kërkuar disa javë ose muaj pushim dhe trajtim të vazhdueshëm mjekësor. Përveç rëndësisë që ka te Përfaqësuesja e Kosovës, Hajdari është një ndër lojtarët më kyç edhe te skuadra e Hoffenheimit, ku prej transferimit të tij ka qenë i padiskutueshëm në formacionin bazë dhe shpesh është përdorur edhe në krahun e djathtë të mbrojtjes. Pas fitores së fundit kundër Borussia Monchengladbachut, klubi i Hoffenheimit ia dedikoi suksesin futbollistit kosovar përmes një postimi ku lojtarët shfaqeshin me fanellën e tij dhe me mbishkrimin për shërim të shpejtë. Mungesa e tij do të jetë një nga sfidat dhe problemet kryesore për përzgjedhësin e Kosovës në ndeshjet e muajit nëntor, ku Përfaqësuesja do të përballet me Izraelin dhe më pas do të udhëtojë në Dublin për ndeshjen kundër Irlandës. Megjithatë, si lajm pozitiv për Përfaqësuesen vjen rikthimi i Lumbardh Dellovës dhe Kreshnik Hajrizit, të cilët janë rikuperuar nga dëmtimet e pësuara më parë me klubet e tyre respektive, Amedsporin dhe Sionin. Në repartin e mbrojtjes mund të ketë edhe lëvizje apo risi të tjera, ku përfshihen kapiteni i Zurichut, Lindrit Kamberi, si dhe lojtari i Sturm Grazit, Albert Vllaci, të cilët kanë qenë më herët pjesë e planeve të stafit teknik dhe përzgjedhësit Franco Foda.

Lidhur me gjendjen shëndetësore dhe programin e rikuperimit të mbrojtësit, menaxheri Sascha Fischer ka dhënë detaje shtesë për media. «Gjuri i tij është i fashuar, pasi po përpiqemi ta mbrojmë dhe t’i mundësojmë sa më shumë pushim. Aktualisht po ndjek programin e rehabilitimit. Siç mund ta kujtosh, ai kishte pasur shqetësime edhe gjatë kohës me Kombëtaren», ka deklaruar ai. Gjatë shpjegimit të dëmtimit në këmbë, menaxheri ka shtuar: «Në lidhje me këmbën, ai ka një çarje të pjesshme të fascies plantare, ndaj duhet të pushojë dhe të marrë trajtimin e duhur». I pyetur se kur pritet rikthimi i tij në fushat e gjelbra, menaxheri Fischer ka përfshirë një shpresë për fundin e periudhës së dimrit, duke deklaruar: «Shpresojmë që kjo të ndodhë në fundin e janarit».