Kurti: Radoiçiq bredh i lirë dhe mbrohet nga Serbia

Gjatë fjalës së tij në seancën e Samitit të Procesit të Berlinit, kryeministri i Kosovës, Albin Kurti, ka kërkuar që vendit t’i jepet statusi i vendit kandidat dhe të hapen negociatat për anëtarësim në Bashkim Evropian, duke shtuar se Kosova vepron sikur vend anëtar. Në ngjarjen e mbajtur në Budva të Malit të Zi, ku mori pjesë këtë të enjte sipas Euronews Albania, ai kërkoi gjithashtu anëtarësimin në NATO për të siguruar parandalimin.

Kurti e ka kritikuar ashpër qasjen e Serbisë, duke e akuzuar se ka përdorur metoda armiqësore të ngjashme me ato të Rusisë ndaj shtetit tonë. Ai ka rikujtuar se Milan Radoiçiq, i cili ka pranuar përgjegjësinë për sulmin terrorist në Banjskë ku mbetet i vrarë rreshteri Afrim Bunjaku, vazhdon të bredhë i lirë në publik dhe mbrohet nga aparati shtetëror serb. Kryeministri përmendi gjithashtu shpërthimin e kanalit të furnizimit me ujë të Ibër-Lepencit në fshatin Varagë, duke theksuar se sulmet e tilla ndaj një demokracie evropiane përbëjnë sulm ndaj gjithë Evropës dhe kërkojnë përgjigje kolektive.

Në fjalën e tij, kreu i ekzekutivit i bëri thirrje pjesëmarrësve që të shikojnë nga afër edhe gjendjen e shqiptarëve në Luginën e Preshevës, ku sipas tij ata po shtyhen hap pas hapi jashtë institucioneve dhe jetës publike e qytetare.