Aktori i Star Trek Walter Koenig ndërron jetë në moshën 90-vjeçare

Aktori amerikan Walter Koenig, i njohur në mbarë botën për rolin e Pavel Chekov në serialin fantastiko-shkencor Star Trek, ka ndërruar jetë të dielën më 25 tetor në shtëpinë e tij në North Hollywood në Los Anxhelos. Përfaqësuesi i tij dhe revista Variety njoftuan se ai ndërroi jetë për shkaqe natyrore i rrethuar nga vajza Danielle dhe mbesa e tij.

I lindur më 14 shtator 1936 në Çikago në një familje emigrantësh me origjinë lituaneze, Koenig u rrit në Manhattan dhe fillimisht studioi psikologji në Universitetin e Kalifornisë në Los Anxhelos. Hapat e parë në aktrim i hodhi në vitin 1962 me një paraqitje të pakredituar si roje në serialin televiziv Combat!. Ai u bë pjesë e ekipit të Star Trek në vitin 1967 në fillim të sezonit të dytë, ku u shfaq si navigatori rus Pavel Chekov në 36 nga 50 episode deri në vitin 1969. Koenig e përsëriti këtë rol ikonik në shtatë filmat e parë të serisë nga viti 1979 deri në vitin 1991, si dhe në serinë online Renegades në vitin 2017. Paraqitja e tij e fundit në këtë univers ishte në vitin 2023 në serialin Star Trek: Picard, ku i dha zërin personazhit Anton Chekov.

Përveç angazhimit të tij në Star Trek, aktori bëri emër edhe me rolin e tij në serialin fantastiko-shkencor Babylon 5 nga viti 1994 deri në vitin 1998, ku luajti krahas bashkëshortes së tij. Ai po ashtu mori pjesë në produksione si Columbo, dha zërin në serialin e animuar Futurama dhe gjatë këtij viti u vlerësua në festivalin Independent Shorts Awards për rolin në filmin Mr. Fleischmann. Përveç aktrimit, ai punoi si skenarist, regjisor dhe producent, duke shkruar episode për seriale si The Powers of Matthew Star, Family, Land of the Lost dhe The Incredible Hulk, si dhe filmin InAlienable të vitit 2010. Për kontributin e tij mbi pesëdekadësh në industrinë e argëtimit, Koenig u nderua me një yll në Hollywood Walk of Fame në vitin 2012.

Jeta personale e aktorit u shënua nga lidhja me aktoren Judy Levitt, me të cilën u martua në vitin 1965 dhe bashkëpunoi në disa produksione filmike. Çifti përjetoi një tragjedi në vitin 2010 kur djali i tyre Andrew Koenig, po ashtu aktor i njohur për rolin në serialin Growing Pains, humbi jetën në moshën 41-vjeçare. Bashkëshortja e tij ndërroi jetë në dhjetor të vitit 2022 në moshën 83-vjeçare pas gati gjashtë dekadash martesë. Koenig lë pas vajzën e tij Danielle Koenig, e cila punon si aktore, skenariste dhe komediane e është e martuar me komedianin Jimmy Pardo.

Themeluesi i agjencisë Galactic Productions, Zachery McGinnis, njoftoi përmes rrjeteve sociale se aktori u nda nga jeta në prani të familjarëve dhe e cilësoi atë si një talent që la gjurmë te breza të tërë admiruesish. Ish-kolegu i tij George Takei, i cili interpretoi Hikaru Sulun në Star Trek dhe kishte dëshmitar Koenigun në martesën e tij në vitin 2008, u shpreh se e ruante miqësinë me të që nga vitet 1960. Njoftimi për ndarjen nga jeta u konfirmua gjithashtu nga gazetari Jesse Thorn, i cili citoi vajzën e aktorit për të nëvizuar lidhjen e fortë mes aktorëve të serialit.