Aktivistet feministe takohen me kryeprokurorin Zejnullah Gashi për rastin e Arlinda Zekajt

Aktivistet e Kolektivit për Mendim dhe Veprim Feminist u takuan me kryeprokurorin e shtetit, Zejnullah Gashi, për të kërkuar trajtim urgjent të rastit të Arlinda Zekajt dhe mbrojtje institucionale për gratë. Arlinda Zekaj u vra më 26 tetor në Vitomiricë të Pejës nga kunati i saj i dyshuar, pasi kishte denoncuar më parë dhunën në familje.

Siç raportoi Zhurma më 4 nëntor 2026, Kolektivi për Mendim dhe Veprim Feminist ka organizuar protesta për tetë ditë radhazi në kryeqytet për të kërkuar drejtësi dhe përgjegjësi nga institucionet për vrasjen e Zekajt.

Aktivistet shkuan fillimisht para objektit të Këshillit Prokurorial të Kosovës. Policia e Kosovës nuk i lejoi me njëherë të hynin brenda për t'u takuar me kryesuesin e KPK-së, Arian Gashin. Zyrtarët policorë dhe zyra e kryeprokurorit u komunikuan në fillim se në takim lejoheshin vetëm pesë përfaqësuese. Megjithatë, pas këmbënguljes së aktivisteve dhe konsultimit me kryesuesin, kryeprokurori Zejnullah Gashi pranoi të priste shumicën e protestuesve në zyrën e tij.

Sipas të dhënave, Arlinda Zekaj u vra më 26 tetor në Vitomiricë të Pejës nga kunati i saj. Para se të ndodhte vrasja, ajo kishte raportuar dhunë në familje dhe kishte kërkuar mbrojtje nga organet përgjegjëse. Ngjarja nxiti protesta të njëpasnjëshme ku u kërkua hetimi i zyrtarëve që trajtuan kërkesat e saj. Për këtë rast janë suspenduar 11 zyrtarë policorë, ndërsa masa janë marrë edhe ndaj kryeprokurores dhe prokurores së Pejës. Po ashtu, drejtori i Policisë së Kosovës, Gazmend Hoxha, ka dhënë dorëheqje.

Aktivistet kërkojnë që organet e drejtësisë të ndërmarrin veprime konkrete dhe t'u japin përparësi rasteve të dhunës e vrasjeve të grave, si dhe të zbardhin plotësisht përgjegjësinë e zyrtarëve për veprimet ose mosveprimet e tyre.