Aktakuzë ndaj Milojko Gjorgjeviqit për krime lufte në Zveçan

Prokuroria Speciale e Kosovës ka ngritur aktakuzë ndaj Milojko Gjorgjeviqit, i njohur me inicialet M.Gj., nën dyshimet për kryerje të krimeve të luftës kundër popullsisë civile gjatë viteve 1998-1999 në komunën e Zveçanit. I pandehuri, i cili ndodhet në paraburgim, akuzohet se ka vepruar në cilësinë e komandantit të Repartit Policor rezervë në Zveçan.

Sipas aktakuzës, në bashkëkryerje me pjesëtarë të tjerë të forcave policore serbe dhe të Ushtrisë Jugosllave, ai dyshohet për vrasje, trajtim çnjerëzor, frikësim, shkatërrim të pronës, dëbim masiv dhe spastrim etnik. Prokuroria pretendon se më 29 prill 1999, i pandehuri mori pjesë në një operacion për rrethimin e një fshati në Zveçan, gjatë të cilit u vranë tre civilë dhe u rrëmbyen shtatë të tjerë. Trupat e gjashtë prej personave të rrëmbyer u gjetën në varrezat e fshatit Suhodoll, kurse trupi i viktimës së shtatë ende nuk është gjetur, ndërsa u dogjën edhe shtëpi e u shkatërrua pasuri materiale.

Rasti i është kaluar për shqyrtim Gjykatës Themelore në Prishtinë.