Shqipëria mbyll Kapitullin 20 të negociatave në Luksemburg
Në Konferencën e dhjetë Ndërqeveritare Shqipëri–BE, vendi ynë shënon një tjetër përparim në procesin e integrimit evropian.
Redaksia ZHURMA · · 1 min lexim
Në Luksemburg mbahet Konferenca e dhjetë Ndërqeveritare Shqipëri–Bashkimi Evropian, ku vendi ynë mbyll përkohësisht Kapitullin 20 për «Ndërmarrjet dhe Politikat Industriale». Ky zhvillim çon në katër numrin e kapitujve të mbyllur përkohësisht përgjatë negociatave të anëtarësimit. Sipas agjendës së zyrës së shtypit të kryeministrisë, ngjarja përfshin nisjen drejt Qendrës Europiane të Konventave, fotografinë e përbashkët të kryeministrit Edi Rama me komisioneren Marta Kos dhe ministrin irlandez Thomas Byrne, si dhe miratimin e agjendës.
Kryeministri i vendit e ka vlerësuar këtë ngjarje përmes një njoftimi ku theksohet se «Shqipëria hedh një tjetër hap drejt Bashkimit Europian, duke mbyllur Kapitullin 20 në Konferencën e 10-të të negociatave të anëtarësimit në BE». Ky kapitull përfshin zhvillimin e sipërmarrjes, politikat industriale, mbështetjen për bizneset, inovacionin dhe rritjen e konkurrueshmërisë së ekonomisë shqiptare. Vendi synon përmbylljen e plotë të negociatave brenda vitit 2027.
