Çfarë prezantoi AKSP në Poloni për zjarrfikjen e Kosovës?

PRISHTINË — Një delegacion i Akademisë së Kosovës për Siguri Publike (AKSP) ka marrë pjesë nga 18 deri më 22 maj 2026 në një mobilitet të stafit në Universitetin e Zjarrfikjes në Varshavë të Polonisë, aktivitet i realizuar në kuadër të bashkëpunimit ndërinstitucional përmes programit Erasmus+ të Bashkimit Evropian.

Delegacioni përbëhej nga Anita Zenuni, ushtruese e detyrës së prodekanes së Fakultetit të Sigurisë Publike, Skender Agaj, zyrtar i lartë për marrëdhënie shumëpalëshe, Halil Asllani, ligjërues i rregullt, dhe Valdet Surdulli, zyrtar i lartë i Divizionit për Përkrahje Studentore. Ekipi u prit nga Olimpia Mnich, koordinatore e Universitetit për programin Erasmus+, dhe major dr. Szymon Ptak, zëvendëskoordinator.

Gjatë vizitës, përfaqësuesit e AKSP-së prezantuan "historikun, gjendjen aktuale, të arriturat dhe perspektivën" e akademisë, ndërsa ndoqën prezantime të institucioneve nga Polonia, Ukraina dhe Uzbekistani. Delegacioni vizitoi Njësinë e Zjarrfikjes dhe Shpëtimit, Shpëtimin Mjekësor Emergjent, studion për komunikim me publikun në raste krizash, laboratorin e inxhinierisë elektrike dhe atë të pajisjeve të shpëtimit. Ata zhvilluan vizitë edhe në Qendrën e Trajnimit për Shpëtim, Logjistikë dhe Bazë Zhvillimi në Nowy Dwór Mazowiecki.

Sipas njoftimit të AKSP-së, partnerët polakë janë shprehur të gatshëm të ndajnë përvojat dhe ekspertizën në rast të krijimit të mundësive për zhvillim dhe investime në këtë sektor në Kosovë.

Burim: Zëri
— Redaksia ZHURMA