Aksident i trefishtë në aksin Tiranë-Durrës, bllokohet qarkullimi
Tre automjete janë përplasur pranë mbikalimit të Rinasit, duke sjellë përmbysjen e një mjeti dhe vështirësi në qarkullim.
Redaksia ZHURMA · · 1 min lexim
DURRËS — Qarkullimi i automjeteve në autostradë është ndërprerë përkohësisht pas një përplasjeje ku janë përfshirë tre automjete. Ngjarja ka ndodhur pranë kthesës së Rinasit, ku njëri nga mjetet e përfshira në aksident, konkretisht një tip “Benz”, ka përfunduar i përmbysur në rrugë.
Sipas të dhënave nga vendi i ngjarjes, në përplasje është përfshirë edhe një automjet tjetër me targa zvicerane. Menjëherë pas sinjalizimit, shërbimet e Policisë dhe autoambulancat kanë mbërritur pranë zonës së aksidentit, ndërkohë që autoritetet nuk kanë dhënë ende një njoftim zyrtar lidhur me praninë e personave të lënduar.
