Si u bë AKA autoriteti i parë akreditues në Europë që njihet në SHBA?
Vendim i Bordit të CHEA, i vlefshëm deri më 31 dhjetor 2033, e bën Kosovën shtetin e parë dhe të vetëm në Europë me këtë status.
PRISHTINË — Agjencia e Kosovës për Akreditim (AKA) është pranuar zyrtarisht si "autoritet akreditues" në Shtetet e Bashkuara të Amerikës, me një vendim të Bordit të Drejtorëve të Këshillit për Akreditimin e Arsimit të Lartë (CHEA). Vendimi do të jetë i vlefshëm për shtatë vjet, deri më 31 dhjetor 2033.
Sipas njoftimit zyrtar të lëshuar nga AKA, Bordi i Drejtorëve i CHEA ka miratuar rekomandimin për njohjen e agjencisë kosovare si autoritet akreditues. Me këtë vendim, Kosova bëhet aktualisht shteti i parë dhe i vetëm në Evropë që gëzon një status të tillë në Shtetet e Bashkuara të Amerikës.
"Kjo njohje nga SHBA-ja vjen më pak se një vit pasi Agjencia e Kosovës për Akreditim u regjistrua në Regjistrin Evropian për Sigurimin e Cilësisë në Arsimin e Lartë (EQAR), duke e bërë Kosovën shtetin e vetëm në Ballkanin Perëndimor me këtë status", thuhet në njoftimin zyrtar të AKA-së.
Agjencia cilëson vendimin e CHEA si "rezultat i një procesi të gjerë dhe të kujdesshëm vlerësimi" dhe si "dëshmi të qartë të reformave të ndërmarra, profesionalizmit institucional dhe përkushtimit të vazhdueshëm të AKA-së për sigurimin e cilësisë në arsimin e lartë".
Të dyja njohjet ndërkombëtare — EQAR dhe CHEA — janë realizuar brenda një periudhe nën një vit, sipas njoftimit të AKA-së.
Burim: Zeri
— Redaksia ZHURMA