Ahmeti zbulon iniciativë në Kushtetuese për ta paditur UÇK-në maqedonase në Hagë
Kryetari i BDI-së thotë iniciativa gjendet në Gjykatën Kushtetuese dhe synon çështje të mbyllura prej mbi 20 vitesh.
SHKUP — Kryetari i Bashkimit Demokratik për Integrim (BDI), Ali Ahmeti, tha se disponon informacione për një iniciativë në Gjykatën Kushtetuese që synon ta padisë Ushtrinë Çlirimtare Kombëtare (UÇK) në Tribunalin e Hagës për krime lufte. Ai foli në emisionin “Rishtazi” të KohaCast.
Ahmeti tha se kjo nuk e frikëson, por rihapja e çështjeve të mbyllura prej më shumë se 20 vitesh do të sillte dhimbje më të madhe sesa hapja e një plage të re.
“Kam informacione që ka iniciativa në Gjykatën Kushtetuese për të hapur çështjet e Tribunalit të Hagës, për ta paditur Ushtrinë Çlirimtare Kombëtare për krime lufte,” tha Ahmeti. “Janë çështje që i kemi mbyllur më shumë se 20 vite më parë.”
Ushtria Çlirimtare Kombëtare ishte një formacion i armatosur shqiptar, i krijuar në fillim të vitit 2001, gjatë konfliktit të armatosur në Maqedoninë e Veriut. Ajo luftoi për avancimin e të drejtave politike, kushtetuese dhe kombëtare të shqiptarëve në vend.
Konflikti zgjati disa muaj dhe përfundoi në gusht të vitit 2001 me nënshkrimin e Marrëveshjes Kornizë të Ohrit, e cila i dha fund luftimeve dhe solli ndryshime kushtetuese e ligjore që zgjeruan të drejtat e komunitetit shqiptar.
Burim: Gazeta Si
— Redaksia ZHURMA