Kush është Agon Ferati, i propozuari për Ministër për Marrëdhënie Ndërmjet Bashkësive?

— Agon Ferati është propozuar për postin e Ministrit për Marrëdhënie Ndërmjet Bashkësive, duke u prezantuar si një profil i orientuar drejt rezultateve me përvojë në menaxhimin e projekteve, politikat publike dhe integrimin evropian.

Ferati është alumn i Programit të Shkëmbimit të Këshillit Amerikan të Liderëve të Rinj Politikë (ACYPL). Ai ka ndjekur trajnime profesionale në institucione si Instituti Robert Schuman, Universiteti Lund, OSBE dhe UNOPS, duke ndërtuar një bazë të fortë për qeverisjen e mirë.

Në aspektin politik, ai shërbeu si Nënkryetari i Parë i Lëvizjes për Reforma në PDSH (LR-PDSH), strukturë që më vonë u riemërua në Aleanca për Shqiptarët (ASH). Gjatë kësaj periudhe, Ferati u konsiderua si një nga figurat kyçe në modernizimin e subjektit politik.

Një nga sukseset e tij më të theksuara ishte udhëheqja e Shtabit Zgjedhor për Zonën Zgjedhore 6 gjatë vitit 2017. Ai koordinoi fitoret në komunat e Bogovinës, Vrapçishtit dhe Gostivarit, duke forcuar pozitën e subjektit në rajonin e Pollogut.

Megjithatë, që nga viti 2020 Ferati kishte dhënë dorëheqje nga funksionet politike. Ai e orientoi karrierën në fushën e menaxhimit të projekteve dhe fondeve evropiane, duke u larguar nga aktiviteti i drejtpërdrejtë politik për t'u fokusuar në zhvillimin lokal.

Në këtë sektor, ai ka qenë pjesë e ekipeve që zbatuan mbi 16 projekte në fusha si infrastruktura, bujqësia dhe mbrojtja e mjedisit. Vlera e përgjithshme e këtyre iniciativave vlerësohet mes 12 dhe 14 milionë euro, duke treguar kapacitete në menaxhimin e fondeve komplekse.

Kthimi i tij në administratën qeveritare vjen në një kohë kur ministrat e rinj në kabinetin e ri të Mickoskit synojnë rritjen e efikasitetit të administratës publike dhe nxitjen e investimeve kapitale për avancimin e perspektivës evropiane.

Burim: TV21
— Redaksia ZHURMA