Abazi thotë se performanca e ministrave është zero

Ish-deputeti Haki Abazi ka drejtuar kritika të ashpra ndaj Qeverisë Kurti dhe ministrave, duke vlerësuar se ata kanë dështuar në realizimin e projekteve të planifikuara dhe përmbushjen e objektivave. Gjatë një paraqitjeje në emisionin “DPT te Fidani”, ai e cilësoi situatën aktuale me shprehjen “Fjalë Demush, punët kërkush”. Abazi shtoi se ekziston një hendek i madh midis planifikimit dhe zbatimit në terren, ndërsa vlerësoi me zero performancën e udhëheqësve të dikastereve, duke përfshirë si qeveritë e kaluara ashtu edhe ato aktuale.

Sipas ish-deputetit, pavarësisht arsyetimeve të mundshme për bllokadë institucionale, ekziston një matricë e matjes së performancave e cila tregon se ministri të caktuara, si Ministria e Tregtisë dhe Industrisë, nuk kanë arritur të përmbushin as dy për qind të objektivave të tyre. Ai theksoi se synimet e ministrive nuk mund të arrihen pa ekzekutimin e planeve konkrete, duke i lidhur kritikat e tij me mungesën e rezultateve në zbatimin e projekteve të paralajmëruara.