23 zyrtarë korrektues nga Kosova nisin punën në tri burgje të Danimarkës

Këtë javë, 23 zyrtarë korrektues nga Kosova kanë nisur angazhimin e tyre gjashtëmujor në tri institucione korrektuese në Danimarkë, konkretisht në Ringe, Vestre dhe Storstrom. Sipas mediumit danez TV2 Fyn, personeli nga Kosova do të jetë pjesë e orarit të rregullt dhe do të punojë në mënyrë të pavarur, duke përfshirë patrullimet në korridore.

Më parë, gjatë vitit 2025, gardianët nga Kosova qëndronin në Danimarkë vetëm për të shoqëruar kolegët vendas gjatë punës, ndërsa këtë radhe ata do të mbajnë përgjegjësi direkte në sektorët e caktuar. Ky zhvillim vjen pas një nisme reformuese në sistemin danez të drejtësisë penale, e cila hoqi rregullin që kërkonte shtetësi daneze, të Bashkimit Evropian apo të Zonës Ekonomike Evropiane për të punuar si zyrtar korrektues, përgjegjës sektori apo transportues i të burgosurve.

Shërbimi Danez i Burgjeve e ka konfirmuar nisjen e këtij angazhimi, duke e cilësuar si pjesë përbërëse të përgatitjeve praktike. Mads Beyer, guvernator i burgut dhe përgjegjës për institucionin që pritet të funksionalizohet më vonë në Gjilan të Kosovës, tha se ky proces shërben si trajnim për hapjen e atij burgu. Guvernatori Beyer po ashtu pranoi se mungesa e personelit vendas dhe presioni mbi burgjet daneze nga numri i të burgosurve kanë qenë faktorë të rëndësishëm për marrjen e këtij vendimi. Ai njoftoi se gjatë javëve të para zyrtarët nga Kosova mund të punojnë pranë një kolegu danez, për të vazhduar më pas shërbimin krah punonjësve me përvojë.

Kjo praktikë pati nxitur reagime më herët nga përfaqësuesit e sindikatave vendëse. Që nga viti 2024, kur u vendos dërgimi i zyrtarëve nga Kosova për trajnim profesional, Unioni i Punonjësve të Burgjeve në Danimarkë kishte shprehur rezerva për praninë e tyre në punët e përditshme.

Zërat:

Bo Yde Sorensen, i cili ishte kryetar i Unionit të Punonjësve të Burgjeve në Danimarkë kur u iniciua ky proces, kishte deklaruar kundërshtimin e tij: «Ne, në asnjë rrethanë, nuk duhet t’i kemi ata në korridoret e burgjeve tona me tufën e tyre të çelësave».

Guvernatori i burgut, Mads Beyer, deklaroi: «Ky është një element i planit të trajnimit, i cili synon përgatitjen për funksionalizimin e burgut që do ta hapim më vonë në Gjilan të Kosovës».

Lidhur me ecurinë e punës në javët e para, Mads Beyer shtoi: «Gjatë javëve të para, ata me gjasë do të punojnë së bashku me një koleg danez, por më pas pritet të kryejnë shërbimin bashkë me kolegë danezë me përvojë të mirë».