Zulfaj: Kënga nacionaliste serbe në Forumin e Zgjerimit të BE-së është skandaloze
Jeton Zulfaj ka reaguar pas interpretimit të një kënge nacionaliste serbe në hapjen e Forumit të Zgjerimit të BE-së në Bruksel.
Redaksia ZHURMA · · Përditësuar · 2 min lexim
Kryenegociatori i Kosovës me Bashkimin Evropian dhe koordinatori kombëtar për Planin e Rritjes, Jeton Zulfaj, ka reaguar ashpër ndaj raportimeve për interpretimin e një kënge nacionaliste serbe në hapjen e Forumit të Zgjerimit të Bashkimit Evropian në Bruksel, e cila mohon shtetësinë e Kosovës. Në platformën X, ai e ka cilësuar ngjarjen si të papranueshme dhe skandaloze, duke shtuar se një aktivitet i tillë i organizuar në kuadër të zgjerimit të BE-së i ka dhënë hapësirë nacionalizmit serb.
Zulfaj ka theksuar se kjo këngë daton nga koha kur regjimi i Sllobodan Millosheviqit ushtronte represion dhe ua shfuqizonte të drejtat shqiptarëve të Kosovës. Krahas kësaj, ai ka kërkuar nga komisionerja evropiane për Zgjerim, Marta Kos, që të japë shpjegime për këto zhvillime dhe të tregojë mbi masat që do të ndërmerren.
Në reagimin e tij, kryenegociatori kosovar ka ngritur gjithashtu çështjen e mospërfshirjes së Kosovës në këtë forum, duke vënë në pah se vendi ka shënuar përparimin më të madh demokratik në Ballkanin Perëndimor gjatë dekadës së fundit dhe është plotësisht i harmonizuar me vlerat dhe politikën e jashtme të Bashkimit Evropian.