Si humbi jetën 25-vjeçari nga Bangladeshi në zjarrin e fabrikës së skafesh në Durrës?
Një punëtor humbi jetën nga asfiksia dhe një tjetër u plagos në zjarrin që dyshohet se nisi nga shpërthimi i një bombule gazi.
DURRËS — Një zjarr i rënë mëngjesin e të dielës në një fabrikë prodhimi skafesh në zonën e Fllakës, Sektor Rinia, ka lënë një të vdekur dhe një të plagosur. Ngjarja ndodhi rreth orës 08:00 në ambientet e magazinave të subjektit me administrator shtetasin S. M.
Si pasojë e flakëve që dyshohet se nisën nga shpërthimi i një bombule gazi në ambientin ku gatuhej për punonjësit, ka ndërruar jetë nga asfiksia shtetasi Omar Faruk, rreth 25 vjeç, me origjinë nga Bangladeshi. Ndërkohë, shtetasi Ch. Ch., rreth 30 vjeç, nga Kenia, u transportua në spital dhe po merr ndihmë mjekësore.
Shërbimet e Policisë dhe zjarrfikëses shkuan menjëherë në vendngjarje dhe e fikën zjarrin. Grupi hetimor, nën drejtimin e Prokurorisë, po punon për sqarimin e rrethanave dhe dokumentimin e plotë ligjor të ngjarjes.
Burim: Telegrafi
— Redaksia ZHURMA