Zhao: Makinat fluturuese në Kinë nga vera e 2027 me çmim rreth 300 mijë dollarë

Makinat fluturuese me dy vende pritet të bëhen realitet në Kinë nga vera e vitit 2027, ku automjeti i kompanisë XPeng do të kushtojë rreth 300 mijë dollarë dhe do të përdoret fillimisht për aktivitete rekreative në zonat rurale dhe për shërbimet e emergjencës.

Ky zhvillim vjen pas afro 10 viteve zhvillim nga kompania prodhuese dhe pas marrjes së miratimit të autoriteteve kineze të aviacionit civil për përdorim të kufizuar, siç raporton The Guardian, ndërsa projekti bën pjesë në strategjinë më të gjerë të Pekinit për zhvillimin e të ashtuquajturës ekonomi e lartësisë së ulët, ku përfshihen dronët, transporti ajror i mallrave dhe automjetet fluturuese për pasagjerë.

Sipas njoftimit të kompanisë XPeng, ndryshe nga makinat tradicionale, ky mjet nuk ka rrota dhe është i pajisur me gjashtë helika elektrike, të ngjashme me ato të dronëve, që mundësojnë ngritjen dhe lëvizjen në ajër. Drejtimi i automjetit bëhet përmes një leve, ndërsa mjeti mund të fluturojë edhe në mënyrë autonome drejt një destinacioni të programuar. Për transportimin e pajisjes, sipas të dhënave të publikuara, shërben një furgon i madh me gjashtë rrota, nga pjesa e pasme e të cilit automjeti fluturues mund të nxirret dhe të shpaloset. Aktualisht, mjeti ka një autonomi fluturimi prej rreth 30 kilometrash dhe mund të ngrihet deri në një lartësi prej 1 kilometri mbi tokë.

Sa i takon fazës së ardhshme të operimit, përdorimi i automjetit do të jetë fillimisht i kufizuar në zona të miratuara posaçërisht në Kinë dhe në operacionet e shërbimeve të emergjencës, ndërsa gjysma e dytë e vitit të ardhshëm shënon afatin kur automjeti pritet të jetë plotësisht gati për përdorim.

Duke folur në Samitin Web në Lisbonë, drejtori ekzekutiv i XPeng, Deli Zhao, deklaroi se «përdoruesit mund të mësojnë ta drejtojnë mjetin brenda vetëm pesë minutash». Sipas Zhao, automjeti është projektuar posaçërisht për të apasionuarit pas udhëtimeve, sporteve në natyrë dhe fluturimit.