Pezullohen ndërtimet në zonat turistike — afati zgjat deri më 15 shtator

TIRANË — Këshilli i Ministrave, me propozim të ministrit të Turizmit, Kulturës dhe Sportit, ka pezulluar ndërtimet në zonat turistike gjatë sezonit turistik 2026, për të garantuar zhvillimin e qetë të tij. Punimet e ndërtimit do të pezullohen nga pikat e nxjerrjes dhe përpunimit të inerteve, te hedhja e themeleve e gërmimit, si dhe çdo punim që shkakton zhurma e ndotje.

Periudha e pezullimit për sezonin turistik 2026 fillon me hyrjen në fuqi të këtij vendimi dhe përfundon më 15 shtator 2026. Nga pezullimi përjashtohen punimet e rifiniturave të brendshme dhe punimet e vogla, që kryhen pas përfundimit të ngritjes së karabinasë, të pajisura me lejet përkatëse, për aq sa nuk shkaktojnë ndotje akustike, pluhur ose ndikime të tjera negative në mjedis. Këto punime kryhen brenda fashës orare 08:00–17:00.

Zonat ku zbatohet pezullimi i punimeve të ndërtimit dhe i aktiviteteve të lidhura me to përfshijnë brezin bregdetar, sipas përkufizimit të legjislacionit në fuqi për planifikimin dhe zhvillimin e territorit, qendrat historike, zonat e mbrojtura, me funksion turistik, dhe qendrat urbane turistike.

Për lejet e ndërtimit ose të aktiviteteve të tjera, të dhëna përpara hyrjes në fuqi të ligjit, bashkitë dhe Këshilli Kombëtar i Territorit dhe Ujit ose autoritetet e tjera kompetente, me kërkesë të subjekteve zhvilluese, miratojnë shtyrjen e afatit të përfundimit të punimeve/aktiviteteve, duke marrë në konsideratë kohëzgjatjen e pezullimit, të miratuar me këtë vendim.

Ministria e Turizmit, Kulturës dhe Sportit, njësitë e vetëqeverisjes vendore, njësitë inspektuese pranë njësive të vetëqeverisjes vendore, Këshilli Kombëtar i Territorit dhe Ujit dhe Inspektorati Kombëtar i Mbrojtjes së Territorit janë përgjegjës për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Burim: Shqiptarja, https://shqiptarja.com/lajm/vkm-stop-zhurmave-e-ndotjes-pezullohen-ndertimet-ne-zonat-turistike-gjate-sezonit-lejohen-vetem-nderhyrje-te-vogla-gjate-orarit-08001700

— Redaksia ZHURMA