Pse viktimat e dhunës gjinore sulmohen në rrjete sociale?

SHKUP — Në vend të solidaritetit, gratë viktima të dhunës me bazë gjinore në Maqedoninë e Veriut po përballen me paragjykime dhe gjuhë të urrejtjes në rrjetet sociale. Rastet tragjike të Ivanës dhe Rosicës dëshmojnë se si opinioni publik jo rrallëherë i kthen viktimat në shënjestër të akuzave.

Sipas ekspertëve të barazisë gjinore, kur raportohet një rast i vrasjes së grave apo dhunës, reagimet e para të qytetarëve nuk shkojnë drejt kërkimit të përgjegjësisë për autorin. Përkundrazi, komentuesit nisin e vënë në dyshim veprimet e vetë viktimës duke pyetur pse ajo nuk u largua më herët.

Doroti Paçkova, eksperte gjinore dhe kryetare e organizatës "United Fem", thekson se ky fenomen i sulmeve digjitale lë pasoja shumë më të thella se vetë dhuna fillestare. Ky linçim publik u dërgon një mesazh disiplinues të gjitha grave të tjera se denoncimi do të ndëshkohet me nënçmim dhe stigmatizim.

Ajo shpjegon se komentet si "e ka kërkuar vetë" ose "pse nuk e la me kohë" riprodhojnë matricat patriarkale të fuqisë. Kjo qasje përbën viktimizim sekondar dhe dhunë të vazhduar. Sipas hulumtimeve, kjo lloj mizogjinie online ka për qëllim heshtjen sistematike dhe përjashtimin tërësor të grave nga sfera publike.

Në këtë kuadër, koncepti i "padrejtësisë epistemike" shpjegon se si grave u hiqet kredibiliteti mbi përjetimet e tyre. Kur një grua vendos të flasë hapur, ajo nuk gjen dëgjim, por përballet me dyshime, tallje dhe keqdashje që vijnë nga një publik që refuzon të pranojë të vërtetën e saj.

Nga ana tjetër, avokatja Neda Çallovska, e cila përfaqësoi familjen e Ivanës, thekson pengesat e mëdha që krijon kjo gjuhë në qasjen ndaj drejtësisë. Ivana i mori jetën vetes dhe vajzës së saj gjashtëvjeçare Katja duke u hedhur nga ballkoni në lagjen Taftalixhe të Shkupit, pas dhunës sistematike.

Çallovska sqaron se shoqëria kërkon një viktimë stereotipike pa konflikte paraprake për t'ia njohur tragjedinë dhe statusin e saj. Çdo devijim nga ky model sjell vetëm sulme dhe gjuhë urrejtjeje. Kjo qasje zhvendos tërësisht vëmendjen nga veprimet kriminale të autorit te sjellja e viktimës, duke krijuar pengesa shtesë në qasjen ndaj drejtësisë.

Burim: Portalb
— Redaksia ZHURMA