Zvarritet K-15 në Maqedoni — vetëm 15% e punëtorëve e morën deri në korrik
Pagesa minimale për sektorin privat këtë vit do të jetë 19.567 denarë, ndërsa në sektorin publik regresi është caktuar në 13.560 denarë.
SHKUP — Vetëm 15 për qind e të punësuarve në Maqedoninë e Veriut e kanë pranuar regresin për pushim vjetor, i njohur si K-15, deri më 1 korrik të këtij viti. Sipas të dhënave zyrtare, pagesa neto mesatare për ata që e morën këtë ndihmë financiare ishte 28.562 denarë, duke shënuar një ecuri të ngadaltë të pagesave.
Për sektorin privat, punëdhënësit janë të detyruar ligjërisht të paguajnë një minimum prej 19.567 denarësh për K-15. Ky detyrim buron nga Marrëveshja e Përgjithshme Kolektive, e cila e përcakton këtë vlerë në 40 për qind të pagës neto mesatare të tre muajve të fundit në shtet, përveç nëse kompania provon vështirësi të rënda ekonomike.
Në sektorin publik, ky regres është fiksuar në vlerën prej 13.560 denarësh, që përkon me 30 për qind të pagës mesatare të vitit paraprak. Këto shifra mund të rriten përmes marrëveshjeve kolektive degërore, ndonëse Maqedonia e Veriut mbetet pothuajse e fundit në Evropë për pagat e punëtorëve të saj.
Burim: Zhurnal.mk
— Redaksia ZHURMA