Maqedonia e Veriut pothuajse e fundit në Evropë për pagat — 624 euro
Shqipëria e ndjek pas me 531 euro, ndërsa Luksemburgu kryeson listën me pagën më të lartë prej 2.771 eurosh sipas të dhënave të reja.
SHKUP — Maqedonia e Veriut renditet pothuajse në fund të listës evropiane për nivelin e pagës minimale bruto ligjore, duke regjistruar një vlerë prej 624 eurosh. Sipas të dhënave të publikuara nga Eurostat më 1 korrik 2026, ky vend lë pas vetëm një numër të kufizuar shtetesh në kontinent.
Në këtë klasifikim, Ukraina pozicionohet e fundit me një pagë minimale bruto prej vetëm 169 eurosh, e ndjekur nga Moldavia me 313 euro. Shqipëria gjithashtu renditet më poshtë se Maqedonia e Veriut, me një pagë minimale bruto ligjore që arrin në vlerën e 531 eurove.
Në anën tjetër, vendet e rajonit dhe ato të Evropës Qendrore shënojnë shifra më të larta, ku Letonia ka një pagë minimale prej 780 eurosh dhe Kroacia kalon pragun prej 1.050 eurosh. Ndërkohë, Polonia arrin në 1.119 euro dhe Sllovenia shënon vlerën prej 1.482 eurosh.
Diferenca mbetet e thellë me shtetet e Evropës Perëndimore, ku pesë vende kalojnë pragun prej 2.000 eurosh. Luksemburgu udhëheq me 2.771 euro, i ndjekur nga Irlanda dhe Gjermania, ndërsa për shtete si Zvicra dhe Italia nuk ka të dhëna të publikuara.
Burim: Alsat-M
— Redaksia ZHURMA
