Violinisti i nominuar për 'Grammy' luan sot veprën e Dafina Zeqiri-Nushit
Krijimi ‘Saint Catharine’ i vitit 2024 do të interpretohet nga violinisti Peter Sheppard Skærved në kuadër të një mbrëmjeje salon.
MINNEAPOLIS — Vepra “Saint Catharine” e vitit 2024, e kompozitores kosovare Dafina Zeqiri-Nushi, interpretohet sot më 6 gusht në një prej muzeve më të rëndësishëm të Shteteve të Bashkuara të Amerikës. Krijimi i profesoreshës së Universitetit të Prishtinës është përfshirë në programin e natës artistike që mbahet në Institutin e Arteve në Minneapolis.
Interpretimi i kësaj pjese do të realizohet nga violinisti me famë botërore Peter Sheppard Skærved, i cili është i nominuar për çmimin prestigjioz Grammy. Kjo ngjarje e veçantë, e titulluar “An Evening Salon”, sjell një ndërthurje të muzikës, artit pamor dhe letërsisë, duke u frymëzuar nga kryeveprat e Dantes dhe Rilindjes Italiane.
Në këtë koncert, krahas Zeqiri-Nushit, do të luhen edhe krijime të autorëve historikë si Giuseppe Tartini dhe Biagio Marini, si dhe kompozitorëve bashkëkohorë Nigel Clarke e Michael Alec Rose. Përfaqësimi në këtë skenë të njohur ndërkombëtare përbën një sukses të madh dhe vlerësim të rëndësishëm për muzikën dhe artin e sotëm kosovar.
Burim: KultPlus
— Redaksia ZHURMA
