Vazhdojnë punimet për zgjerimin e rrugës “Hajrullah Zymi”

Kanë nisur dhe po vazhdojnë punimet për zgjerimin e rrugës “Hajrullah Zymi” në Fushë Kosovë, e cila gjendet pranë shkollës fillore “Mihal Grameno”. Projekti synon zgjerimin e rrugës nga dy në tri korsi, përkatësisht nga dy në tri shirita, me dy shirita për dalje dhe një për hyrje, me qëllim të lehtësimit të qarkullimit të automjeteve dhe përmirësimit të trafikut.

Drejtori i Investimeve Kapitale në Komunën e Fushë Kosovës, Arianit Tërmkolli, ka njoftuar nisjen e punimeve. Komuna ka njoftuar se kjo ndërhyrje infrastrukturore synon të rrisë sigurinë për të gjithë pjesëmarrësit në komunikacion. Në kuadër të këtij projekti është paraparë gjithashtu ndërtimi i një shtegu për çiklistë dhe përmirësimi i trotuareve, për të krijuar kushte më të sigurta për këmbësorët dhe çiklistët.

Komuna e Fushë-Kosovës ka njoftuar se investimet në infrastrukturë do të vazhdojnë edhe në projekte të tjera, me qëllim të përmirësimit të kushteve të qarkullimit dhe krijimit të lehtësirave më të mëdha për qytetarët.