Ura e Gurit në Shkup pajiset me ndriçim të ri dekorativ

SHKUP — Një prej simboleve më të njohura të kryeqytetit të Shkupit ka fituar pamje të re gjatë orëve të mbrëmjes, pas përfundimit të projektit për ndriçimin arkitekturor dhe dekorativ. Përveç Urës së Gurit, ndriçim të ri kanë marrë edhe Ura Syri dhe ura pranë Teatrit Popullor Maqedonas. Sipas Qytetit të Shkupit, ndriçimi i ri vë në pah arkitekturën karakteristike të urës dhe harqet e saj prej guri, ndërsa kryetari Orce Gjorgjievski ka shkruar se ky investim i jep një madhështi të veçantë zemrës së qytetit.

Përurimi i ndriçimit u bë në prani të zëvendëskryeministrit Bekim Sali, kryetarit të Komunës së Esenlerit në Turqi, Mehmet Tevfik Goksu, ambasadorit turk Alper Aktaş, drejtorit ekzekutiv të Halk Bankës, Fatih Shahbaz, si dhe konsullit të nderit, Aydovan Ademoski. Projekti u realizua në kuadër të Protokollit për Miqësi dhe Bashkëpunim ndërmjet Qytetit të Shkupit dhe Komunës së Esenlerit nga Turqia, me mbështetjen e Halkbankës, ndërsa nga komuna vendase është shprehur mirënjohje për kontributin e dhënë. Ndërkohë, pas inaugurimit u ngrit debat për shkak të mungesës së gjuhës shqipe në tabelën informuese pranë urës, çka solli heqjen e saj për t'u rishikuar dhe për t'u përfshirë edhe gjuha shqipe.