Universiteti i Tetovës shënoi Ditën Botërore të Ushqimit

TETOVË — Fakulteti i Teknologjisë Ushqimore dhe të Ushqyerit në Universitetin e Tetovës organizoi një aktivitet me rastin e 16 Tetorit, Ditës Botërore të Ushqimit, nën moton “Inovacioni i sotëm, ushqimi i së nesërmes”. Në këtë ngjarje morën pjesë drejtues të Universitetit, profesorë, studentë dhe nxënës të shkollave të mesme, të cilët u njoftuan me rëndësinë e ushqyerjes së shëndetshme dhe rolin e shkencës në përmirësimin e cilësisë së ushqimit.

Rektori i Universitetit të Tetovës, Prof. Dr. Kushtrim Ahmeti, theksoi rëndësinë e ndërgjegjësimit të shoqërisë për ushqyerjen dhe ndikimin e saj në cilësinë e jetës. «Sensibilizimi për këto çështje është jashtëzakonisht i rëndësishëm në rrethanat në të cilat jetojmë. Ushqimi që konsumojmë sot reflektohet në shëndetin tonë në të ardhmen, prandaj duhet të jemi të vetëdijshëm për cilësinë e tij dhe mënyrën tonë të jetesës», u shpreh ai.

Dekani i Fakultetit të Teknologjisë Ushqimore dhe të Ushqyerit, Prof. Dr. Gafur Xhabiri, vuri në dukje se kjo ditë synon ngritjen e vetëdijes për rëndësinë e ushqimit dhe lidhjen ndërmjet shkencës dhe konsumatorëve. «Sot kemi ftuar edhe nxënës të shkollave të mesme, ndërsa studentët tanë kanë përgatitur ushqime tradicionale, duke ndërthurur njohuritë akademike me vlerat e traditës sonë ushqimore», theksoi ai.

Në kuadër të aktivitetit, studentët prezantuan ushqime tradicionale të përgatitura prej tyre, duke promovuar trashëgiminë gastronomike dhe vlerat ushqyese.