UNESCO vlerëson dokumentet e reja strategjike për Butrintin
Në sesionin e 48-të të Komitetit të Trashëgimisë Botërore në Korenë e Jugut u lavdërua edhe progresi për Beratin, Gjirokastrën dhe Liqenin e Ohrit.
Redaksia ZHURMA · · Përditësuar · 1 min lexim
BUSAN — UNESCO ka vlerësuar dokumentet e reja strategjike për Parkun Kombëtar të Butrintit gjatë punimeve të Komitetit të Trashëgimisë Botërore. Në sesionin e 48-të të këtij komiteti, të mbajtur në Busan të Koresë së Jugut, delegacioni shqiptar prezantoi progresin e arritur në mbrojtjen e pasurive kulturore dhe natyrore të vendit.
Komiteti vlerësoi forcimin e bashkëpunimit me komunitetin lokal dhe angazhimin për menaxhimin e qëndrueshëm të Butrintit. Ky forum global mblodhi mbi 3 mijë delegatë dhe ekspertë nga 196 shtete të ndryshme, të cilët diskutuan masat për ruajtjen e pasurive me vlerë të jashtëzakonshme universale.
Përveç Butrintit, në këtë sesion u vlerësua edhe puna e bërë për Qendrat Historike të Beratit dhe Gjirokastrës. Ekspertët njohën progresin në avancimin e Planit të Integruar të Menaxhimit dhe forcimin e koordinimit ndërmjet institucioneve shqiptare për mbrojtjen afatgjatë të këtyre dy qyteteve muze.
Prezantimi shqiptar u ndal edhe te Rajoni i Liqenit të Ohrit, ku u theksuan masat e ndërmarra për mbrojtjen e kësaj pasurie ndërkufitare. Këto masa përfshijnë shpalljen e Gadishullit të Linit si Ansambël Arkitektonik Urban dhe forcimin e bashkëpunimit me Maqedoninë e Veriut.
Burim: ATSH
— Redaksia ZHURMA
