Maqedonia ul akcizën e karburanteve — benzina shtrenjtohet 3 denarë në vend të 4

SHKUP — Qeveria e Maqedonisë miratoi sot një vendim për uljen e akcizës në benzinë dhe naftë, si masë për të zbutur pasojat e rritjes së çmimeve në bursat ndërkombëtare dhe për të mbrojtur standardin jetësor të qytetarëve. Vendimi përcakton llojet e energjive, periudhën kohore të zbatimit dhe mënyrat e llogaritjes së akcizës.

Qeveria thekson se gjatë periudhës së fundit ka pasur një mesatare të lartë të kuotimeve të naftës në tregjet botërore. Për këtë arsye, Qeveria po e ndjek vazhdimisht situatën me analiza ditore të lëvizjeve të çmimeve dhe mbetet e përkushtuar në ndërmarrjen e masave të shpejta dhe aktive për të zbutur presionin ndaj qytetarëve dhe ekonomisë.

Sipas përllogaritjeve qeveritare, nëse nuk do të ndërhynte, çmimi i benzinës do të rritej rreth 4 denarë për litër, ndërsa nafta rreth 8 denarë për litër. Me uljen e akcizës të miratuar sot, rritjet priten të zvogëlohen përkatësisht në rreth 3 denarë për benzinën dhe 6 denarë për naftën, duke amortizuar një pjesë të rritjes globale.

Qeveria pret që Komisioni Rregullator për Energjetikë, në përputhje me kompetencat e tij ligjore, të miratojë çmimet e reja me pakicë të karburanteve. Efekti i masës synon të sigurojë që qytetarët të vazhdojnë të paguajnë çmime më të ulëta sesa do të ishin pa këtë ndërhyrje qeveritare.

Burim: Portalb
— Redaksia ZHURMA