Ukraina ndan 1 miliard euro nga huaja e BE-së për mbrojtjen

Ukraina pritet të ndajë deri në një miliard euro nga huaja që po merr nga Bashkimi Evropian për financimin e projekteve të përbashkëta me industrinë evropiane të mbrojtjes. Kjo nisma synon të afrojë më shumë industrinë ushtarake ukrainase me partnerët evropianë, duke u përqendruar kryesisht në mbrojtjen ajrore dhe raketore, dronët, sistemet kundër dronëve dhe prodhimin e municioneve.

Sipas një dokumenti konfidencial të Komisionit Evropian, mjetet do të transferohen në Programin Evropian të Industrisë së Mbrojtjes dhe në Instrumentin e Mbështetjes së Ukrainës, buxheti i të cilit do të rritet më shumë se katërfish nga 300 milionë euro. Huaja prej 90 miliardë eurosh nga BE-ja është paraparë për të mbështetur përpjekjet e Kievit në luftë gjatë viteve 2026 dhe 2027, ndërsa Brukseli ka vendosur të përshpejtojë disa pagesa për të mbuluar mungesën në buxhet.

Ky bashkëpunim bën pjesë në Partneritetin Strategjik Industrial të Mbrojtjes BE-Ukrainë, i lançuar në korrik të vitit 2026 përmes nënshkrimit të një letre synimi. Mbi këtë bazë, Komisioni Evropian po harton një Pakt Industrial të Mbrojtjes që synon përshpejtimin e dërgesave të pajisjeve, heqjen e pengesave rregullatore dhe nxitjen e vendeve anëtare që të përdorin fondet e papërdorura të programit SAFE. Ambasadorët e vendeve të BE-së pritet ta diskutojnë këtë nismë, ndërsa synimi mbetet që pakti të përfundojë deri në fund të vitit.