UEFA ndryshon rregullat: pezullim pas 4 kartonëve

NYON — UEFA ka miratuar dy ndryshime të rëndësishme në rregulloren e saj, të cilat hyjnë në fuqi nga fillimi i sezonit të ri dhe do të zbatohen në Ligën e Kampionëve, Ligën e Evropës dhe Ligën e Konferencës. Lojtarët nuk pezullohen më pas tre kartonëve të verdhë, por vetëm pas katër kartonëve gjatë fazës së ligës.

Pas pezullimit të parë, ndëshkimi i radhës vjen pas çdo dy kartonëve të tjerë të verdhë, pra pas të gjashtit, të tetit e më tej. UEFA synon që ndryshimi të zvogëlojë numrin e pezullimeve dhe t'u mundësojë skuadrave më shumë stabilitet gjatë garave evropiane.

Risia e dytë lidhet me tabelat elektronike. UEFA hoqi rregullin që kërkonte ndalimin e orës në minutën e 45-të dhe të 90-të; nga sezoni i ri, koha do të vazhdojë të ecë edhe gjatë minutave shtesë të përcaktuara nga gjyqtari, si në fund të pjesës së parë ashtu edhe në fund të ndeshjes, përfshirë vazhdimet.

Me këtë vendim, UEFA e afron rregulloren me praktikën e Premier League, ku sistemi është zbatuar prej dy sezonesh. Ndryshimet vijnë në një periudhë të tensionuar në marrëdhëniet me FIFA-n: së fundmi, 55 federata anëtare votuan kundër planeve të FIFA-s për t'u dhënë investitorëve privatë të drejta tregtare dhe menaxhuese mbi disa gara.

Burim: KultPlus
— Redaksia ZHURMA