Al-Khelaifi refuzon të kandidojë për president të FIFA-s
Drejtues të UEFA-s tentuan ta bindnin kreun e PSG-së të sfidonte Gianni Infantinon, por ai thotë se nuk ka asnjë ambicie për postin.
PARIS — Presidenti i Paris Saint-Germainit, Nasser Al-Khelaifi, ka hedhur poshtë raportimet se mund të kandidojë për president të FIFA-s në zgjedhjet e vitit 2027. Sipas mediave ndërkombëtare, disa drejtues të UEFA-s kishin tentuar ta bindnin Al-Khelaifin që ta sfidonte presidentin aktual të FIFA-s, Gianni Infantino.
Megjithatë, një burim pranë drejtuesit të PSG-së ka bërë të ditur se ai nuk ka asnjë ambicie për ta marrë drejtimin e organit më të lartë të futbollit botëror. “Nasser nuk ka absolutisht asnjë ambicie, asnjë qëllim dhe asnjë interes për këtë rol në FIFA. Ai do të vazhdojë t’i mbështesë në qetësi institucionet e futbollit botëror dhe evropian”, ka deklaruar burimi për RMC Sport.
Al-Khelaifi ishte përmendur si kandidat i mundshëm për shkak të ndikimit të tij të madh në futbollin evropian. Përveç postit të presidentit të PSG-së, ai drejton edhe European Club Association dhe BeIN Media Group. Burime pranë tij i kanë cilësuar raportimet për kandidaturën si “zhurmë mediatike”.
Ndërkohë, Gianni Infantino mbetet favoriti kryesor për të siguruar edhe një mandat në krye të FIFA-s. Sipas raportimeve, ai vazhdon ta ketë mbështetjen e fuqishme të federatave nga Afrika, Azia dhe Amerika e Jugut, të cilat kanë përfituar nga rritja e të ardhurave dhe programet e financimit gjatë mandatit të tij.
Burim: Sinjali
— Redaksia ZHURMA