Trump i ofron presidentit të UFC-së Dana White postin e sekretarit të shtypit

Presidenti i Shteteve të Bashkuara të Amerikës, Donald Trump, i ka ofruar publikisht drejtuesit të organizatës së arteve marciale të përziera UFC, Dana White, postin e sekretarit të shtypit të Shtëpisë së Bardhë. Njoftimi u bë përmes një postimi në rrjetin social Truth Social, ku Trump i bëri thirrje drejtpërdrejt White që të pranojë këtë detyrë.

Vendi i zëdhënësit të administratës ka mbetur vakant pasi Katie Zacharia u largua nga pozicioni më 16 tetor, vetëm pesë ditë pasi kishte marrë detyrën dhe pas konferencës së saj të parë për mediat. Para saj, ky funksion mbahej nga Karoline Leavitt, e cila në fund të gushtit njoftoi se po largohej për t’iu përkushtuar familjes. Trump ka deklaruar se Leavitt do të vijojë të shërbejë si këshilltare e jashtme, duke e vlerësuar atë si një nga ndihmëset e tij më të besueshme.

Në mesazhin e tij publik, Trump e përshkroi drejtuesin e sporteve luftarake si një luftëtar dhe kampion, ndërsa kërkoi që ai të merrte me vete si ndihmës disa sportistë të njohur të MMA-së, duke përmendur emrat e Islam Makhachev, Khabib Nurmagomedov, Justin Gaethje, Daniel Cormier, Amanda Nunes dhe Kayla Harrison. Drejtori i komunikimit i Shtëpisë së Bardhë, Steven Cheung, i cili ka punuar më parë për organizatën UFC, shprehu mbështetjen e tij në platformën X duke i kërkuar White ta pranojë propozimin. Nga ana tjetër, një këshilltar i Shtëpisë së Bardhë tha se propozimi i presidentit ishte bërë në formë shakaje, ndërsa CNN raportoi, duke iu referuar një burimi të njohur me çështjen, se White e ka refuzuar ofertën.

Në një konferencë për shtyp pas një aktiviteti boksi në Londër të shtunën në mbrëmje, White konfirmoi se ishte nisur drejt Uashingtonit për t'u takuar me presidentin amerikan. Ai gjithashtu publikoi në rrjetin Instagram një fotografi pas foltores së konferencave për shtyp në Shtëpinë e Bardhë me mbishkrimin se po shkon drejt një kapitulli të ri. Trump dhe White kanë pasur marrëdhënie të afërta prej vitesh, ku presidenti ka marrë pjesë në evente të UFC-së, ndërsa White ka mbajtur fjalime në konventat kombëtare të Partisë Republikane në vitet 2016, 2020 dhe 2024, si dhe në një aktivitet në prag të inaugurimit në janar 2025.

Takimi i paralajmëruar ndërmjet Donald Trump dhe Dana White është caktuar të mbahet të hënën në Uashington.

“Jam i kënaqur të njoftoj se të madhit Dana White i është ofruar posti i sekretarit të shtypit të Shteteve të Bashkuara të Anerikës. Dana, të lutem pranoje këtë detyrë!”, shkroi Trump në rrjetin e tij social.

“Po fluturoj drejt Uashingtonit tani. Do të takohem me të të hënën. Jam i sigurt se do të kemi më shumë për të thënë pas këtij takimi”, u shpreh Dana White për gazetarët.