Tri festivale kosovare në samitin e Asociacionit Evropian të Festivaleve
PrizrenFest, DokuFest dhe ReMusica marrin pjesë në takimin vjetor në Budva të Malit të Zi.
BUDVA — Tri festivale të rëndësishme të Kosovës po marrin pjesë në Samitin e Asociacionit Evropian të Festivaleve (EFA), që po mbahet nga 16 deri më 19 maj në Budva të Malit të Zi. Pjesëmarrësit kosovarë janë festivali ndërkombëtar i teatrit në ambient të hapur “PrizrenFest”, festivali ndërkombëtar i filmit dokumentar dhe të shkurtër “DokuFest” si dhe festivali ndërkombëtar i muzikës “ReMusica”.
Samiti i EFA-s, i njohur edhe si Samiti i Festivaleve të Artit, konsiderohet një nga takimet më të rëndësishme për komunitetin e festivaleve artistike në Evropë. Këtë vit janë mbledhur mbi 250 përfaqësues festivalesh, institucione kulturore dhe partnerë ndërkombëtarë. Në fokus të diskutimeve janë roli i festivaleve në shoqëri, bashkëpunimet ndërkufitare, politikat kulturore, qëndrueshmëria dhe mbështetja për artistët e rinj.
“DokuFest”, i themeluar në vitin 2002 në Prizren, është sot një prej festivaleve më të njohura të filmit dokumentar dhe të shkurtër në Evropën Juglindore. Festivali ka fituar status ndërkombëtar si festival kualifikues për BAFTA dhe për Akademinë Evropiane të Filmit. “ReMusica”, themeluar po ashtu në vitin 2002 nga kompozitori Rafet Rudi, është bërë një prej platformave më të rëndësishme për muzikën klasike dhe bashkëkohore në rajon. “PrizrenFest” ndërkohë ka ndërtuar ura bashkëpunimi me rrjetet kulturore evropiane përmes programeve artistike dhe shkëmbimeve ndërkombëtare.
Valtida Shukriu, e cila përfaqëson “PrizrenFest” në samit, e ka cilësuar pjesëmarrjen si “përfaqësim i diplomacisë kulturore”. Ajo ka thënë se qëllimi është promovimi i qytetit dhe krijimi i bashkëpunimeve me organizata dhe artistë ndërkombëtarë, duke përfshirë partneritete për fondet e Bashkimit Evropian.
Asociacioni Evropian i Festivaleve është themeluar në vitin 1952 dhe sot lidh mbi njëqind festivale dhe organizata kulturore nga rreth 40 shtete. Nga Kosova në EFA janë anëtarë edhe “Chopin Fest”, “Skupi Kamerfest” i violinistes Sihana Badivuku, si dhe “Anibar”. Nga Shqipëria nuk ka asnjë festival të anëtarësuar.
Burim: Koha.net
— Redaksia ZHURMA
