Tragjedi në jug të Kretës: 12 emigrantë të pajetë dhe 105 të shpëtuar

Një ngjarje e rëndë ka tronditur ujërat në jug të ishullit të Kretës në Greqi, ku dymbëdhjetë emigrantë janë gjetur të pajetë në bordin e një gomoneje. Sipas të dhënave paraprake, mjeti lundrues u pikas nga një anije transporti mallrash me flamur maroken rreth pesëmbëdhjetë milje detare në jug-jugperëndim të Kaloi Limenes, e njohur gjithashtu si Kala Limenas.

Pas sinjalizimit, Roja Bregdetare greke dhe agjencia evropiane Frontex ndërhynë në zonë përmes operacioneve të koordinuara kërkim-shpëtimi. Gjatë ndërhyrjes së parë u arrit të shpëtoheshin tetëmbëdhjetë persona, ndërsa u nxorën edhe trupat e dymbëdhjetë viktimave. Të mbijetuarit u transferuan drejt portit të Agia Galinit.

Ndërkohë, dy operacione të tjera u zhvilluan në jug të Kalamakit, ku mjete ajrore dhe drone të Frontex-it identifikuan dy gomone të tjera me dhjetëra persona në bord. Në operacionin e parë u zbuluan rreth dyzet e shtatë emigrantë, ndërsa në të dytin rreth dyzet të tjerë, të cilët u morën në anijet e forcave evropiane për t'u transportuar drejt porteve të zonës.

Sipas bilancit paraprak të autoriteteve, në total janë identifikuar rreth një qind e shtatëmbëdhjetë emigrantë në të tria operacionet, ku një qind e pesë prej tyre kanë mbijetuar. Autoritetet greke vazhdojnë procedurat përkatëse për të zbardhur rrethanat e plota të kësaj tragjedie detare.