Çfarë kërkon Toshkovski nga BE-ja për migracionin në Ballkan?

SHKUP — Ministri i Punëve të Brendshme, Pançe Toshkovski, iu drejtua të pranishmëve në hapjen e Takimit të Përfaqësuesve të Lartë të Procesit të Pragës për dialogun mbi migracionin, që zhvillohet sot dhe nesër në Shkup. Në fjalimin e tij, ai theksoi se migracioni nuk është temë abstrakte politike, por realitet që ndihet në kufij, komunitete dhe jetën e njerëzve.

"Maqedonia gjatë viteve ka mësuar se menaxhimi efektiv i migracionit kërkon investim të vazhdueshëm në burimet njerëzore, modernizimin e infrastrukturës kufitare dhe bashkëpunim të ngushtë me vendet fqinje dhe agjencitë evropiane", theksoi ministri Toshkovski.

Duke iu referuar Paktit të ri të Bashkimit Evropian për migracionin dhe azilin, ai nënvizoi se zbatimi i suksesshëm mund të arrihet vetëm përmes përfshirjes aktive të vendeve të Ballkanit Perëndimor. "Pakti nuk do të mund të funksionojë plotësisht nëse zbatohet vetëm brenda Bashkimit Evropian, ndërsa vendet e Ballkanit Perëndimor mbeten të vetme për t'u përballur me pasojat dhe sfidat", paralajmëroi ai.

Toshkovski kërkoi "bashkëpunim të vërtetë, mbështetje financiare e parashikueshme, ndihmë operacionale dhe mekanizma formalë partneriteti" për harmonizimin e legjislacionit, shkëmbimin e informacionit dhe aktivitetet e përbashkëta. Ai premtoi se Maqedonia e Veriut mbetet e përkushtuar ndaj modernizimit të menaxhimit kufitar, konceptit të kufijve inteligjentë, forcimit të trajnimeve dhe luftës kundër kontrabandimit të emigrantëve.

Takimi do të vazhdojë me sesione tematike për Konferencën e Pestë Ministrore të Procesit të Pragës dhe Planin e ri të Veprimit 2028–2032, politikave aktuale të migrimit në rajon, si dhe masa konkrete për përballimin e sfidave.

Burim: Tetova Sot
— Redaksia ZHURMA