Sa vite punë i duhen një familjeje për të blerë një banesë në Tiranë?
Sipas të dhënave të Numbeo, Tirana renditet në vendin e pestë në Europë për raportin më të lartë mes çmimit të banesave dhe të ardhurave.
TIRANË — Tregu i pasurive të paluajtshme në kryeqytetin shqiptar vijon të renditet ndër më të papërballueshmit në Europë. Sipas të dhënave më të fundit të platformës Numbeo, një familjeje shqiptare i duhen mesatarisht 18.1 vite të ardhura për të blerë një banesë.
Kjo shifër e vendos Tiranën në vendin e pestë në Europë për raportin më të lartë mes çmimit të banesave dhe të ardhurave. Blerja e një shtëpie në Tiranë rezulton më e vështirë sesa në qytete si Vjena, ku nevojiten 17.4 vite, Parisi me 17 vite, apo Londra me 16 vite.
Renditjen e kryesojnë Lisbona dhe qyteti kroat i Splitit, ku raporti arrin në 18.7 vite. Pas tyre vijojnë Praga, Milano dhe Tirana, ndërsa në dhjetëshen e qyteteve më të shtrenjta renditen gjithashtu Beogradi dhe Brno.
Ekonomisti Mike Langen nga ABN AMRO shpjegon se çdo raport mbi nivelin 10 konsiderohet problematik për blerësit. Një shifër e tillë tejkalon kufijtë e zakonshëm të kreditimit bankar dhe aftësinë paguese të familjeve mesatare.
Pozicioni i Tiranës tregon se çmimet e banesave janë shkëputur ndjeshëm nga ritmi i rritjes së të ardhurave të familjeve shqiptare. Edhe pse pagat janë rritur vitet e fundit, ritmi i rritjes së apartamenteve ka qenë dukshëm më i lartë.
Një situatë e ngjashme vërehet në Portugali, ku çmimet e banesave janë rritur me afro 240% gjatë dekadës së fundit, ndërsa pagat vetëm me 59%. OECD evidenton mungesën e ofertës dhe pengesat rregullatore si faktorë kryesorë të krizës së strehimit në atë rajon.
Analiza të tjera sugjerojnë se rritja e të ardhurave dhe normat më të ulëta të interesit kanë ndikuar më shumë në rritjen e çmimeve sesa ritmi i ndërtimit. Për qytetarët e Tiranës, kjo do të thotë se pronësimi i një banese po bëhet gjithnjë e më i paarritshëm.
Burim: Report Tv
— Redaksia ZHURMA