Tirana kërkon stadium për ndeshjen me Laçin

TIRANË — Pas fitores në derbi kundër Partizanit dhe momentit pozitiv që po kalon skuadra, Tirana ka zhvendosur fokusin te ndeshja e radhës kundër Laçit, e cila është planifikuar të luhet të shtunën në orën 13:30. Megjithatë, klubi kryeqytetas duhet të përcaktojë gjatë kësaj jave stadiumin ku do të presë kurbinasit.

Impianti i Tiranës, “Selman Stërmasi”, nuk i plotëson kushtet e nevojshme për zhvillimin e takimit, ndërsa “Air Albania” është rezervuar nga Egnatia për ndeshjen evropiane ndaj Midtjylland në Conference League. Përballë kësaj situate, stadiumi i Vorës mbetet e vetmja alternativë që bardheblutë po shqyrtojnë, pasi fusha e tij është në gjendje të mirë. Gjithsesi, mbetet e hapur mundësia që sfida të luhet në një tjetër impiant të një skuadre të Superiores, ndërsa zgjedhja përfundimtare pritet të merret brenda pak ditëve për të siguruar një organizim sa më transparent për tifozët.