Kovaçev: Shkupi pa arsye ankohet në institucionet evropiane

SHKUP — Eurodeputeti bullgar Andrej Kovaçev deklaroi se Shkupi nuk ka arsye të ankohet në institucionet evropiane lidhur me rastin e Iva Mihailovës nga Koçani, e cila u largua për në Bullgari pavarësisht ndalimit të gjykatës për t'u larguar nga vendi. Kovaçev u shpreh se rasti duhet të shqyrtohet nga një perspektivë humanitare dhe se e kishte informuar Presidenten e Komisionit Evropian, Ursula von der Leyen, për situatën gjatë një takimi të Partisë Popullore Evropiane në Itali. Sipas tij, Bullgaria nuk ka bërë absolutisht asgjë të tillë që të konsiderohet problematike.

Ministria e Punëve të Jashtme e Maqedonisë së Veriut njoftoi se do të informojë Bashkimin Evropian dhe Këshillin e Evropës për largimin e Mihailovës nga vendi, duke vlerësuar se veprimet e institucioneve bullgare cenojnë përpjekjet për ndërtimin e besimit dhe janë në kundërshtim me marrëdhëniet e fqinjësisë së mirë. Mihailova, e cila ndodhet në Bullgari, deklaroi se në Maqedoninë e Veriut ishte përsekutuar për shkak të prejardhjes së saj bullgare. Ndaj saj rëndon akuza për një aksident rrugor me pasojë vdekjen e të riut Besim Durmishi nga fshati Ljuboten i Shkupit, ngjarje e cila ndodhi më 7 tetor 2025 në rrugën Koçan-Shtip. Familja e të ndjerit Durmishi po merr pjesë në seancat dëgjimore në Gjykatën Penale në Koçan, ndërsa në kohën e largimit ndaj Mihailovës ishte në fuqi masa gjyqësore që e ndalonte të dilte nga Maqedonia dhe emri i saj figuronte në listën e ndalimit në kalimet kufitare.