TIFF 2026 eksploron njeriun përmes temës HUMANOGRAPHY
Edicioni i 24-t i TIFF-it, nga 21 deri më 27 shtator, vë në qendër pyetjen se çfarë do të thotë të jesh njeri sot.
Tirana International Film Festival (TIFF) do të mbajë edicionin e tij të 24-t nga 21 deri më 27 shtator. Këtë vit, festivali ka zgjedhur temën HUMANOGRAPHY – Bring it back, duke e kthyer fokusin te njeriu dhe ndjenjat që na bëjnë të përbashkët, si dinjiteti, kujtesa, identiteti dhe dashuria.
Në një kohë kur identiteti shpesh reduktohet në profile dhe marrëdhëniet njerëzore në ekrane, TIFF 2026 ngre pyetjen se çfarë do të thotë të jesh njeri sot. Filmat e përzgjedhur për këtë edicion nuk synojnë të japin përgjigje të gatshme, por të lënë shikuesin përballë pyetjeve dhe të hapin territore të ndryshme të realitetit.
Programi përfshin filma shqiptarë dhe ndërkombëtarë që trajtojnë histori personale, konflikte, identitete dhe dilema. Sipas organizatorëve, kinemaja ka një marrëdhënie të ndërlikuar me realitetin, duke na premtuar se po shohim botën, ndërsa në fakt na paraqet një këndvështrim mbi të.
Me këtë temë, TIFF kërkon të rikthejë në qendër njeriun, në një shoqëri gjithnjë e më të fragmentuar, duke e parë HUMANOGRAPHY-n si një mënyrë për të lexuar të gjithë programin e festivalit.