Tévez zgjedh mes Messit dhe Ronaldos dhe tregon dallimin

Ish-sulmuesi argjentinas Carlos Tévez ka ndarë mendimin e tij rreth rivalitetit të njohur mes Lionel Messit dhe Cristiano Ronaldos. Gjatë një interviste për emisionin Rio Ferdinand Presents, të drejtuar nga ish-mbrojtësi Rio Ferdinand, ai u pyet rreth zgjedhjes mes dy yjeve të futbollit. Përgjigjja e tij u orientua nga Lionel Messi, duke theksuar se aftësia e bashkëkombësit të tij për të kryer veprime të jashtëzakonshme në mënyrë instinktive e bën të veçantë. Sipas tij, Messi nuk kishte nevojë t'i përsëriste vazhdimisht në stërvitje driblimet e njëjta.

Në anën tjetër, Tévez e përshkroi Cristiano Ronaldon si një lojtar jashtëzakonisht të përkushtuar ndaj punës dhe përgatitjes fizike, i cili kalonte shumë kohë duke përmirësuar teknikën dhe çdo detaj të lojës së tij. Ish-sulmuesi theksoi se të dy kishin forcë fizike, karakter dhe dëshirë për të qenë më të mirët, ndërsa rivaliteti i ndihmoi të ruanin nivelin e lartë. Megjithatë, ai vlerësoi se Ronaldo ishte superior në lojën me kokë dhe duelet ajrore. Përvoja e Tévezit mbështetet te bashkëpunimi i drejtpërdrejtë me ta, pasi ka qenë bashkëlojtar i Ronaldos te Manchester Unitedi nga viti 2007 deri në vitin 2009 dhe ka luajtur përkrah Messit në kombëtaren e Argjentinës.