Interi dhe Milani prezantojnë stadiumin e ri Generali Stadium me 71.500 vende

Interi dhe Milani kanë prezantuar projektin e stadiumit të ri të përbashkët në Milano, i cili do të mbajë emrin komercial Generali Stadium dhe do të disponojë 71.500 vende. Hapja e impiantit modern është planifikuar për sezonin 2031/32, ndërsa marrëveshja me kompaninë e sigurimeve Generali kap vlerën e 650 milionë eurove.

Pas shumë dekadash duke ndarë të njëjtën shtëpi, stadiumin legjendar San Siro, dy klubet e Milanos do të ndërtojnë impiantin e ri pranë objektit aktual. Ndërtimi i stadiumit me 71.500 ulëse është pjesë e strategjisë afatgjatë të Interit dhe Milanit për përmirësimin e infrastrukturës dhe shtimin e të ardhurave për nevojat e futbollit bashkëkohor.

Detajet e projektit u zbuluan gjatë një konference për media në kështjellën Castello Sforzesco në Milano. Sipas konceptit të paraqitur, stadiumi do të ndërtohet me një formë të veçantë që ngjan me një tas të vendosur mbi një bazament të ngritur, me një strukturë gjashtëkëndore në fasadë. Generali do të marrë gjithashtu rolin e partnerit zyrtar të sigurimeve për të dyja skuadrat, duke u shërbyer klubeve si një burim i qëndrueshëm i të ardhurave. Megjithatë, në ndeshjet e organizuara nga UEFA, objekti do të quhet Stadiumi Milano, për shkak të rregullave që kufizojnë emërtimet tregtare në garat evropiane, ngjashëm me Allianz Stadium të Juventusit që në Evropë prezantohet si stadiumi i Juventusit.

Impianti i ri pritet të bëhet shtëpia e dy skuadrave nga viti 2031, me synimin për të sjellë një infrastrukturë moderne për klube dhe tifozët e tyre. Lidhur me stadiumin historik San Siro, është paraparë që ai të qëndrojë në këmbë deri në përfundimin e plotë të punimeve të impiantit të ri, përpara se të nisë shembja e tij.